Македонската карате-репрезентација успешно го заврши настапот на 28. Балканско првенство за сениори и 9. Балканско карате-првенство за ветерани, кое се одржа во Бања Лука, Босна и Херцеговина, освојувајќи вкупно три бронзени медали – еден во екипна и два во поединечна конкуренција.
Во силна конкуренција од повеќе од 400 натпреварувачи од 12 земји, македонските репрезентативци настапија во дисциплините борби и кати, при што особено се истакна женската сениорска селекција.
Екипен успех во женска конкуренција
На третиот и последен натпреварувачки ден беа на програмата екипните борби. Женската репрезентација на Македонија во состав: Викторија Јовановска, Јована Мицовска, Рудина Алиу и Наталија Карова (резерва) го освои бронзениот медал.
Во првото коло нашите каратистки загубија од селекцијата на Србија со 1-2, при што единствената победа ја забележа Мицовска. Во репасажниот дуел за бронза Македонија ја совлада Словенија со 2-0, со победи на Јовановска и Алиу, со што беше обезбеден заслужениот медал.
Двојна бронза за Мицовска и Јовановска
Претходно во поединечна конкуренција, во категоријата до 61 кг, бронзени медали освоија Јована Мицовска и Викторија Јовановска. Со тоа двете репрезентативки го заокружија настапот со по два бронзени медала – по еден индивидуално и еден екипно.
Настап на машката селекција
Машката сениорска репрезентација во борби, во состав Данило Божовиќ, Васил Јаневски, Вукашин Јовановиќ, Мурсил Мисини, Реџеп Рушити, Стефан Стојановиќ и Петар Заборски, во првото коло загуби од домаќинот со 1-4.
Со освоени три медали, македонската репрезентација уште еднаш ја потврди својата конкурентност на балканската сцена, особено во женска конкуренција, и продолжува со континуитет на успешни настапи на регионалните натпреварувања.
